中環出更：善團遊立會 爭做「政客」

興奮如入大觀園

來自東華三院、保良局、博愛醫院、仁濟醫院、仁愛堂及九龍樂善堂嘅董事局成員，尋日下午齊到訪立法會，興奮如參觀大觀園。博愛總理曾裕最搞笑，當議會職員介紹議事廳嘅按掣投票設施時，佢即時提問話：「如果真係被人掟蕉，可唔可以按掣令安全網彈出接『蕉』？」博愛副主席陳李妮就對傳媒擺下嘅「咪兜陣」相當好奇，笑言對住咁多「咪牌」發言，感覺好high。

參觀活動上，東華三院兩位總理王賢誌（Vinci）及陳祖恒（Sunny）不時收到恭喜之聲。原來Vinci有意競逐第四副主席，Sunny就競逐第五副主席，聽聞兩位呼聲甚高，跑出機會甚大，過年後好快揭盅。

名人豪宅接連發生爆竊案，鄭錦鐘（左二）養狼狗防賊，郭羅桂珍（右二）話會加強保安。右一為保良局總理陳黎惠蓮，左一為總理朱文忠。

博愛副主席陳李妮（右二）、彭少衍（中）、吳錦青（右一）、總理曾裕（左一）及林群（左二）參觀新立法會大樓，感覺如入大觀園。

參觀議會之餘，近排名人豪宅接連被爆竊，都係席間熱話。早前老公旗下豪宅遭人爆竊嘅保良局副主席郭羅桂珍話，好驚訝玩具大王蔡志明千金嘅豪宅遇竊，幸好佢同老公居住嘅大宅向來保安嚴密，佢亦絕少擺放貴重首飾，唔擔心會成為賊人目標。保良局主席鄭錦鐘都打醒十二分精神，屋企養咗兩隻精靈大狼狗，一見陌生人走近就會狂吠，警覺性極高。

卓妮