深水埗尋日上演一幕鬧劇，露宿者惡鬥露宿者，有人打傷對方後獨守棚屋淋火水，同警方對峙兩小時，擾擾攘攘一番之後先至被勸服帶署調查。
究竟發生乜嘢事呢？簡單咁講，一名露宿者涉嫌偷衫，另一名露宿者氣憤難平，於是乎就引起爭執，兩個同是天涯淪落人嘅瞓街一族先而口角，繼而動武，最終就出現咗獨守棚屋淋火水與警對峙嘅一幕。
大家可能仍然一頭霧水，點解兩個露宿者要內訌？佢哋究竟係邊個吖？其實都唔重要咯，畢竟瞓街一族通常無名無姓，迫於無奈大隱隱於市，長期處於被忽略嘅可憐狀態，想搞清楚佢哋嘅身份唔係咁容易。功夫茶今日主要想同大家研究嘅其實係，因乜事幹香港愈來愈多流落街頭嘅無產階級？
根據社會福利署數字顯示，深水埗區露宿者嘅登記數字由二○一一年十一月嘅一百八十一名，增至二○一三年十一月嘅三百六十八名，兩年升幅超過一倍。發言人話喎，社署資助非政府機構營辦嘅宿舍共約二百個單位，其他非政府機構有四百個宿位，可為露宿者提供臨時居所。
表面上露宿者可以入住宿位，不必忍受天寒地凍或者日曬雨淋，實際上又係點嘅呢？都話咗係臨時居所啦，呢類宿位一來唔係專門接待露宿者，二來最多住三個月就要走，到頭來露宿者仍然要露宿。
正所謂咯喎，有頭髮冇人想做瘌痢，好似深水埗南昌街同界限街一帶嘅露宿者咁吖，流落街頭嘅原因大同小異，不外乎冇錢冇屋冇工開，連劏房嘅租金都畀唔起，輪候入住公屋又遙遙無期。家陣公屋一人單位有超過十萬人排隊，瞓街一族唔知幾時先至有機會上樓。喂，社署每月發放嘅租金津貼僅僅一千四百元咁大把，租個廁所都唔夠啦，你叫佢哋有乜可能唔係繼續瞓街呢？好衰唔衰喎，民政署近年大量取消營辦宿舍，導致露宿者數目有增無減。
講來講去，又係樓價實在太高，租金實在太貴，公營房屋長期供不應求，再一次證明特區政府嘅房屋政策非常失敗，而社署又漠視無產階級，搞到流浪漢同露宿者苦不堪言。露宿者獨守棚屋淋火水，背景音樂其實係一首賺人熱淚嘅悲歌！
講到呢度，功夫茶不期然諗起前特首曾蔭權爵士嘅豪言壯語，佢話喎，香港不存在冇瓦遮頭嘅問題。貪曾嘅講法當然同事實不符啦，瞓街一族絕對可以指住佢鼻哥大叫「你呃人」。
露宿者愈來愈多，點算呢？好心特區官僚唔好咁冷漠啦，即使一時三刻起唔切公屋，至少動用關愛基金幫一幫露宿者吖嘛，無關無愛好可恨o架！