為免引起軒然大波，政府去年已經延長現任主席蘇澤光（Jack So）多一年任期，但估計呢招今年冇得再用，否則就會遭人話柄「一年又一年」。雖然距離Jack So卸任仲有大半年時間，但到底邊個接掌貿發局，已有不少傳聞。
與歐美日有深厚聯繫
有具分量嘅商界人士分析，貿發局主席呢個位唔止要熟悉本地商界，仲要有國際視野，觀乎現時有可能接棒嘅商界中人，仍然睇好恒隆集團主席陳啟宗（Ronnie），雖然佢出晒名係「梁粉」，但佢同歐美、日本等地商界有深厚聯繫，唔應該因「梁粉」背景而對佢能力有所質疑，但佢願唔願意做又係另一回事。