政情：朱牧當年被寸「石頭爆出嚟」
元旦遊行期間，「佔領中環」行動發起人之一嘅朱耀明（朱牧），喺街站同班後生仔載歌載舞，認真老當益壯，原來佢今個月已七十歲大壽。不過，朱牧尋日喺電台節目自爆，自己可能唔係七十歲，連出世日子都係老作嘅，當年來港攞身份證更被俗稱「移民局」嘅入境事務部職員冷言冷語，問佢「係咪石頭爆出嚟」，原來佢係孤兒出身。
出生日期老作
朱牧講起孤兒經歷，話童年同嫲嫲喺內地生活，十四歲前嘅自己係點樣連一張相都冇，直至一九五四年來港申請身份證，入境事務部職員要求佢填報父母姓名，朱牧好自然就答冇，但被職員反問：「你石頭爆出嚟o架？」朱牧惟有幫「父母」改個名了結咗件事，但自此亦少咗個麻煩，冇人再問佢父母係邊個喇。
至於一月二十一日呢個出生日期，朱牧笑言其實都係隨意改，仲話如果有得再揀，希望揀一月一日仲易記喎。至於朱牧餐壽宴，暫定擺二十四圍，收到嘅禮金全部會撥捐佔中。