政情：策發會內亂 人人鬥Hea
政府架構入面有唔少諮詢組織，其中最具智囊特色嘅就係策略發展委員會（策發會）。政府四處廣納人才加入策發會，最主要係想聽取各界意見，但原來過去一年，策發會內部立立亂，而且士氣麻麻。我哋向唔同策發會委員收風，發現班委員為咗唔想周末開會，幾乎搞到反枱之外，一班問責官員開會又唔提交相關政策文件，令一班委員一頭霧水，最終大家開會只係水過鴨背就算數。
一年四次會已投訴
過往策發會都安排喺星期六開會，諗住官員同策發會委員都會得閒啲，抽到時間開會。不過，有策發會委員就對此好不滿，一心諗住星期六、日可以放低公事，陪吓屋企人，但偏偏就要去開會，由朝開到中午先至散會，等於冇咗半日假期，而且仲係冇人工添！據理解，去年策發會只係開咗四次會，亦只係頭三次會議安排喺星期六舉行，唔知有幾阻礙佢哋嘅家庭生活呢？
除咗委員不滿開會時間外，班官員亦唔多配合策發會開會。策發會每次開會都有特定議題，例如教育、房屋、醫療等，雖然每次開會都有相關政策官員到場解釋政策，但就甚少提交相關文件畀班委員細閱，搞到班委員次次開會都一頭霧水，唔知由邊度講起，但又怕意見同政策相違，惟有講埋啲「阿媽係女人」嘅建議，大家水過鴨背就算數。
「吳得掂」長氣難頂
策發會委員冇文件在手，惟有靠官員解釋，但聽聞某啲官員講嘢特別長氣，好似人稱「吳得掂」嘅教育局局長吳克儉就係最佳例子。據聞有次吳得掂就所屬政策發言，一講就講成十五分鐘，要有其他人向佢打眼色先停止發表「偉論」。有委員呻話，手上冇文件，唔通即時用筆抄低官員講乜咩？唔少委員都覺得好冇癮，好多時搞到會議有成四分一人缺席。
據理解，策發會方面已從善如流，將會議改為周五召開，令班委員周六可以放假，但政策局唔肯提交文件至今仍未解決。睇嚟班問責官員要認真檢討問題所在，否則嚇走晒啲智囊，到時策發會就真係要改名做「吹水會」喇，係官員同自己吹水呀！