中環出更：聯合國家族 陳智思屋企避論政
行政會議成員陳智思（Bernard）尋日出席一個活動時，同青年人講到點樣求變同自強，又提到自己家族嘅樹形圖，分享點樣同來自唔同國家嘅家人相處。Bernard話，自己係第四代泰國華僑，太太係新加坡人，而有啲兄長就分別來自馬來西亞同印尼。佢話，平日喺屋企一定唔會談論政治，因為大家嘅諗法同所關注嘅議題都唔同，因此希望啲青年人識得點樣體諒同包容他人喎。
勸青少商政改要包容
Bernard之後又話，政改方案需要大家去討論，同時要按照《基本法》嘅安排去做，所以一定要大家平心靜氣去傾，先可以凝聚共識。佢講咁多包容、體諒嘅道理，皆因認為佔領中環行動將影響香港嘅經濟，係非常不理智嘅做法，同時亦覺得政改原地踏步係最差嘅處理方法。
此外，Bernard又同青年人分享經驗，話本身鍾意繪畫，點都估唔到會加入銀行界、保險界，繼而從政，所以叫班青年人就算未來工作唔係自己志願，又或喺人生旅途遇到不如意事，都要盡力同抱住堅毅鬥志，跨過難關。
卓妮