中環出更：名人唔怕寒 度假向北望
啱啱過去嘅聖誕節同新年天氣凍冰冰，唔少人選擇出外旅遊避寒，但百仁基金主席兼理文造紙主席李文俊（Raymond）、叙福樓集團執董黃傑龍（Simon）就偏偏唔怕凍，不約而同選擇到天寒地凍嘅北方度假。Raymond一家五口到河北省張家口滑雪度假、登萬里長城，過咗六日真正嘅白色聖誕。Simon就請十多名同事同遊韓國，仲趁機搵商機。
自從去年六月Raymond由爸爸李運強手上接過理文造紙主席職位後，Raymond更加公私兩忙。所以負責管理集團物業嘅李太黃敏儀（Money），去年中就開始幫手處理百仁基金會務，實行夫唱婦隨。
李文俊去河北 黃傑龍遊首爾
Raymond話，今次一家五口順利起行，全靠太太幫手，事關百仁基金會今個月十日舉行就職禮，Raymond冧莊做多屆，由於事前嘅籌備工作繁重，好彩Money聯同基金會秘書處手足加緊落實細節，佢哋全家人先可享受溫馨聖誕。
至於Simon一行人遊首爾，周圍去搵食，佢哋到當地甚具特色嘅魚市場，仲即場買咗八爪魚做刺身，入口一刻被八瓜魚吸盤啜住條脷，眾人大呼過癮。佢哋仲見到五斤重撻沙魚，諗住買去食店蒸嚟食，點知當地人無蒸魚文化，唔識整，惟有放棄唔買。
佢哋又食生蟹、行超市，見到超市只賣韓國當地白米，八公斤售價二百多港元，貴過香港多多聲。考察完一輪，咁有乜可以引入香港？做飲食業嘅Simon三句不離本行，大讚西式韓餐有潛力，稍後引入香港都未定喎！
卓妮