高層居民有家歸不得
【本報訊】一條鹹水管「摧毀」六部升降機玩殘居民﹗由於大廈住有不少年邁長者，有長者沿樓梯落街時大呻辛苦，另有高層居民更有家歸不得，被迫在附近公園流連打發時間。區議員質疑保安員有疏忽，並要求房署檢討。
住在中層的鄧女士嘆謂：「今朝七點幾起身返工，先知冇升降機用，成班人喺更亭度嘈，我放工買完餸返嚟都要搭升降機上去十六樓再落樓，好麻煩。」另一名住中層七旬住客怒稱：「有冇搞錯呀！咁耐都仲未整完。」此外，住在廿四樓的黃先生，飲茶返家後發現升降機仍未修復，故到公園打發時間，無奈地說：「等整番好先返屋企，我太太暫時都唔敢落街。」
觀塘區區議員黃春平稱，今次事故嚴重，他質疑有保安員巡邏時有疏忽，若一早揭發有水管爆裂，便能及時閂水掣，阻止鹹水流入電梯槽，造成居民不便及困擾，要求有關房署作出檢討，提升服務質素。