二○一三即將結束，二○一四好快來臨，功夫茶預祝大家新年快樂之餘，亦有必要回顧一下今年嘅情況。春夏秋冬一年四季三百六十五日，千頭萬緒回顧乜嘢好呢？不如咁啦，睇睇《東方日報》投訴版嘅一個另類排行榜，睇完大家會明白兩件事，第一件事係官僚嚴重失職，第二件事係本報為民請命。
另類排行榜嘅正確名稱係「投訴政府部門排行榜」，高踞榜首嘅係食環署，被投訴逾三千宗；第二位係警務處，被投訴二千二百幾宗；第三位係房屋署，被投訴接近二千宗；第四位係屋宇署，被投訴一千五百宗。
整體而言，本報過去一年總共接獲主要針對政府部門嘅投訴接近三萬宗，反映官民關係不和諧。當然啦，《東方日報》過去三十七年風雨無間為讀者提供優質服務，完全值得信賴，所以市民有乜嘢不滿就會諗到向本報表達訴求，投訴政府部門排行榜先至會咁蔚為奇觀。打個譬喻吖，如果你唔信蝙蝠俠有本事伸張正義，你都唔會朝天開射燈，向蝙蝠俠投訴有壞蛋入侵葛咸城啦！
食環署之所以高踞投訴榜首，原因好簡單啫，呢一個政府部門嘅工作同市民息息相關，偏偏署方嘅態度得過且過，結果就怨聲載道嘞。好似食肆阻街問題咁吖，存在咗好多年，滋擾過好多人，街坊不斷反映，可惜食環署由始至終懶懶閒。食肆阻街問題經過無數市民嘅不斷反映，觸發申訴專員公署主動調查，食環署有冇積極取締呢？唔好意思，懶骨頭仍然係懶骨頭，想唔高踞投訴榜首都唔得啦！
屋宇署被投訴嘅數字雖然不及前三位，不過以升幅而論簡直可以稱王稱霸。屋宇署今年被投訴一千五百宗，數字飆升超過三成，當中一大原因係市民愈來愈關注樓宇結構安全，奈何屋宇署嘅表現冇辦法令人收貨。以深水埗大埔道舊樓僭建為例，本報將個案轉介屋宇署，居然事隔半年都未回覆喎，你話係幾咁缺乏危機感呢。你知啦，自從土瓜灣馬頭圍道冧樓死人之後，社會人士對於房屋安全問題變得好敏感，官老爺愛理不理嘅態度好令人反感啫。
城市大學專業進修學院學術統籌宋立功講得啱，政府弱勢，仲要處理前朝留落嚟嘅殘局，令政府施政難上加難。講到前朝殘局，不得不提貪曾禍港，如果唔係呢一個前特首曾蔭權爵士管治失敗，香港都唔會通街都係滿腹牢騷啦。
點都好，《東方日報》為民請命係唔會變o架嘞，唯一希望變嘅係嚴重失職嘅官僚賣懶成功，新嘅一年唔好再漠視民意呀！