北區區議會最近喺北區大會堂近日新安裝咗十幾條圓柱形聖誕燈飾，廿三日已經亮燈，但唔知點解聖誕節都過埋，包裝燈飾嘅透明膠袋都未拆封，膠袋入面仲要積晒水，養住大量蚊滋。有網民就批評燈飾唔拆膠袋又裝晒水，好似笠咗個安全套咁，仲話擔心啲蚊滋會傳播登革熱同日本腦炎喎，批評北區區議會唔知點監管。北區區議會負責燈飾宣傳小組成員賴心就話，燈飾設計同管理都係承辦商負責，仲話會跟進投訴咁話。話時話，咁耐都唔拆膠袋，莫非想好好保護盞燈？
（互聯網）
