政情：天文台製天氣預報放上網
市民要睇天氣報告，就非要等電視台喺特定時段播放不可。天文台就搞搞新意思，尋日起安排節目主持早晚輪流喺YouTube報道天氣，經天文台流動應用程式及網站「天氣廣播站」播出，方便市民隨時隨地接收氣象資訊。有關節目更會加插喺四個電視台新聞時段內，但大家唔洗太擔心，天文台話電視台有自由選擇播放節目，即係天氣女郎報道環節唔會被取代。
主持人陽盛陰衰
負責報天氣嘅主持人除咗原有班底外，會新加入四男一女新面孔，全部由天文台眾多科學主任當中精挑細選出來，其中一位更擁有博士學位，陣容都算鼎盛，但有人就批評女主持人得一個，陽氣過盛嘅局面會導致欠缺觀賞性咁話喎！咁又唔係無道理嘅，事關有時天氣預測得唔係咁準，市民望到天氣女郎都唔會太扯火嘛。
講番尋日一早一晚兩條片，打頭炮報天氣主持節目分別有科學主任楊漢賢同李鳳瑩，兩條片各長約兩分鐘，主持人報天氣報得頭頭是道，解釋都專業，但惟獨略嫌有少少悶囉。