政情：元旦全民投票 「試機」恐混亂

票站得廿部電腦

不過，到時夾埋都只得二十部電腦畀人投票，分分鐘出現混亂，而佔中發起人戴耀廷（Benny）又對投票結果唔多着緊，似乎只係為明年六月嘅第二次投票日「試機」。

Benny坦言，元旦日投票唔會估計投票人數，亦毋須訂目標，只係希望畀市民熟習投票系統，同埋測試系統頂唔頂得住，若果當日已經有四十萬人投票，就要籌錢加大系統容量喇。咁講法，呢次投票咪即係搵市民做白老鼠，為六月第二輪投票幫手測試系統？

除咗唔估計投票人數，Benny又唔估計元旦遊行人數，但認為傳統上較七一遊行的少。他又批評警方容許敵對意見團體在同一場合集會，必然出現公共安全風險，過去亦有雙方陣營人士發生語言衝突，所以今次係好好機會畀佢哋練習點樣對待挑釁行為。