政情：經民聯民望包尾
政黨嘅支持度除咗靠每四年一次嘅立法會及區議會選舉反映外，從平時各機構嘅民調走勢，都可以略略睇到實況。有組織喺十二月訪問咗約一千名市民，結果發現建制派政黨嘅支持度全線下跌，跌幅最勁係新民黨、民建聯（民記）、工聯會及經濟民生聯盟（經民聯），而經民聯更由上次嘅尾二跌到落包尾谷底。經民聯聲稱未來選舉走直選路線，但按現時支持度嚟睇，將來一旦取消功能界別，佢哋肯定一鋪清袋。
今次政黨政團支持度調查係由香港研究協會進行，結果同其他機構嘅民意調查有些少出入，事關以往建制派政黨嘅支持度點都能夠進佔三甲，但今次建制派政團得分大跌，令頭五名位置拱手讓畀泛民主派政黨，而排第六位竟然係近期經常同政府對着幹嘅自由黨，似乎該黨唔止路線愈走愈泛民，連支持度都同泛民都好相似，難怪有消息話中央打算對該黨「最後規勸、最後機會」，否則或受到懲罰。
建制派方面，好似工聯會、民記及新民黨支持度都插水式下挫，好彩佢哋仍然徘徊喺中游位置，未至於去到榜末。而得分最低嘅兩個政團，一個係名不經傳嘅新世紀論壇，另一個就係經民聯。究竟因咩事令經民聯排名跌到最低呢？最大可能其實係打擊炒樓嘅「雙辣招事件」。
促撤辣招食惡果？
經過買家印花稅（BSD）打擊下，呢幾個月嘅樓市已經無升溫迹象，部分二手樓樓價已劈價求售，樓價跌對小市民嚟講應該係好事，但經民聯就喺立法會內要求政府撤銷辣招，仲話雙辣招會搞亂香港。呢啲講法似乎同小市民想法背道而馳，好可能亦係佢哋支持度愈來愈低嘅主因。
經民聯成日話自己支持者係中產群，唔喜歡民粹主義，今次民調正正摑佢哋一巴，因為有四成受訪者認為自己屬於中產階層，但經民聯都得分咁低，睇怕係佢哋未夠實力吸引中產支持。老實講，經民聯喺立法會內手握七票，議價能力唔低，但偏偏係市民心目中，佢哋得分竟然排最尾，呢個世界有因必有果，佢哋領導層係時候反省吓點解得呢個「果」嘞。