中環出更：蔣麗芸送錢畀菲傭退休買地
馬尼拉人質事件未解決，有政黨日前向立法會要求限制輸入菲傭以制裁菲國，立法會議員蔣麗芸（Ann）竟然趁呢期風頭火勢，自爆計劃送走屋企嘅菲傭返鄉下，唔通Ann都難忍菲方處事方法，要怒炒菲傭洩憤？非也，阿Ann透露要返鄉下嗰位菲傭已經跟隨蔣家三十年，只係比阿Ann大一歲，係時候夠鐘回鄉安享晚年喎。咦？咁阿Ann明年咪同樣可以退休？
自阿Ann加拿大留學回港後，多年來一直食呢位菲傭煮嘅飯，佢大讚呢位老臣子煮嘢好好食，早年仲保送菲傭去廚藝中心學廚，所以自己結婚多年都無懼成為「無飯主婦」。菲傭臨別在即，阿Ann話已經畀咗筆錢菲傭回鄉買地起屋，菲傭亦搵咗自己嘅姨娚女接班，確保晚晚煮出啱晒蔣家胃口嘅菜式。估唔到平日聲大大嘅阿Ann不但有義氣，仲係良心僱主，菲傭嘅一家都照顧埋。
不過，少咗個老臣子或多或少都會影響屋企份餐單，需唔需要請多個菲傭幫手？Ann豪氣咁話：「唔好問我有幾多工人，幾多司機，只可以話你知我有一個老公」。明白！身為蔣家二小姐，屋企有數唔晒嘅工人同司機係不言而喻喇！
卓妮