政情：葉劉學三個小生去旅行
聖誕假期正式開始，立法會亦休戰一星期，好多議員都趕住跳出香港鬆一鬆，叉足電先再次搏鬥。身兼行政會議成員嘅葉劉淑儀就選擇同愛女歐遊，但葉太話今次出遊係受到電視節目《三個小生去旅行》啟發，決定去意大利羅馬及佛羅倫斯呢兩個未去過嘅地方，希望嚟一次歷史、藝術文化之旅，佢已帶備歷史書，似乎做足準備喎。
葉太早幾個月先同愛女歐遊，咁快又去多次，乜唔嫌悶咩？葉太話，早前睇咗電視台一個旅遊節目，講三位小生謝賢、胡楓同Joe Junior遊覽西班牙、葡萄牙，搞到佢心思思想去多次歐洲，但佢決定同三位小生一樣，要去一啲未踏足過嘅地方，今次就揀咗羅馬、佛羅倫斯。
帶名著沿途細讀
一向喜愛浸淫書香嘅葉太，仲自爆帶埋本名著《Why the West Rules－For Now》沿途細讀，呢本書主要分析西方國家點解可以喺過去幾百年，統治地球上大部分地方，原來同「地理」有關。本書又話中國未來好大機會崛起，西方國家唔可以睇少，估唔到葉太連去旅行睇書都咁政治正確喎。