上周六一年一度嘅工展會開幕，一開始就恍如古戰場咁，但見一群大叔、阿伯，個個暴走狂奔，為了那一蚊海味，搞到「主客相搏，山川震眩，聲析江河，勢崩雷電」，場面之墟冚、凌亂，確使人驚心動魄，有阿婆被碰撞至跌倒，幸好不是頭先着地，否則大件事矣！
一如本報《功夫茶》話齋：一之謂甚，豈可再乎。工展會一開波亂成咁係一個警號，此趟雖不致有嚴重意外，但下次卻未必有咁好彩，《功夫茶》呼籲港府、有關機構及商戶吸取教訓，改善安排，唔好搞出個大頭佛。
誠然，人性好貪，一蚊雞搶一袋海味確係夠吸引，然而如此做宣傳而搞到啲老人家爭崩頭，始終係不該！老朽提醒有關商戶，散貨尾嗰幾日，切實要諗吓如何安排妥善去貨，唔好又引來一陣哄搶，屆時真有乜冬瓜豆腐，令工展會盛事蒙上陰影，咁就得不償失矣！
從工展會哄搶的場面，見到大批老人家一窩蜂去搶平嘢，反映長者貧窮嚴重（不排除有長者只係想執平嘢）；老朽年少無知時，跟啲叔伯入場逛工展，記憶中人頭湧湧卻秩序井然，工展小姐笑容可掬，四處閒逛，睇吓新嘢食吓零食，都唔知幾得戚優游寫意，哪有如今的凌亂哄搶！
講真，嗰個年代，市民也不見得搵得特別多，可社會就是靜好祥和，孔子所說的「老者安之，朋友信之，少者懷之」，就是那些年和諧歲月的寫照！
如今社會躁暴，丟嘢成狂，佔中成癮，連老人家都瘋狂「佔」工展會爭一蚊海味，當然，此「佔」關乎口腹。「民生冇小事」，政府看到了吧？米蘭•昆德拉在《生命不可承受之輕》寫過那些在大街上的捷克人，手裏高舉某個主義萬歲的標語，而喊在心裏的沒有寫出來的口號卻是「生活萬歲」。老朽只能喟然嘆曰：沒有生活，佔中有何意義？