政情：收料站：「習酒」成內地官場新貴

自從早前中央實施「八項規定、六項禁令」，加上推行三公消費限制後，中央各部門喺送禮、宴會、接待都大行節約之風。以往好多本地商界人士同內地官員打交道，餐桌上有幾支國酒茅台「坐鎮」，但呢個場面已經一去不復返。聽聞一支普通茅台由最高價三千多元，暴跌至二千元左右就有得成交，但相反酒精濃度同樣咁高嘅「習酒」，就成為內地官場新貴，價格愈升愈有。

茅台貶值　港商趁低吸納

據商界中人透露，有國酒稱號嘅茅台，因為內地禁止官員喺公開場合飲烈酒，內地需求大跌，自然拉動價格下降。咁出產茅台嘅貴州茅台酒廠咪少咗生意？

當然唔係啦，因為近年新興嘅「習酒」，正正係貴州茅台酒廠旗下一種醬香型白酒，近年價格不斷上升，由兩三年前五百元一支，最近已升穿一千元水位。

其實飲酒各有所好，冇話邊種酒特別好飲啲。本港商界好多都依然追捧茅台，仲藉低價大量入貨添。

第一手消息請下載on.cc東網iPhone/iPad/Android/Windows Phone Apps