政情：鄉紳密謀再封村
鄉議局主席劉皇發（發叔）月初提出「處女」修訂，反對大浪西灣納入郊野公園範圍，博到盡咁力挺鄉事勢力挑戰政府，擺到明落政府面，可惜都係無功而還，更令一班坐擁「不包括土地」嘅鄉紳人人自危，擔心自己塊地遲早落入政府手中，變成郊野公園草皮。多個鄉村代表就趁尋日鄉議局開會時向發叔遞信，「知會」發叔村民有意再發起「封村」行動，實行寧為玉碎，不作瓦全。
想封屏山文物徑
呢班村代表不乏現時五十幾幅正陸續等候政府發落嘅「不包括土地」地主，講到明一旦封村，莫講話政府官員，連晨運客、行山發燒友等閒雜人等，都一律不得出入鄉紳嘅「私人土地」。據了解，連假日人山人海嘅元朗屏山文物徑都係封路目標之一，可想而知牽連甚廣，分分鐘連旅遊發展局都要呼籲旅客唔好登門造訪。佢哋寧願封咗自己條村變「孤城」自求多福，莫非信唔過發叔嘅辦事能力？
鄉紳們封村事小，但佢哋豈會係省油的燈呢？有鄉議局執委更揚言，假若政府迫到班村民走投無路，硬要收地嘅話，唔排除動員全個鄉議局共六百幾條村嘅村民「佔領」村外土地，每條村派幾架車喺村外馬路慢駛，都已經夠堵塞香港通往內地嘅主要幹道，咁咪仲激過「佔領中環」行動？
抗爭行動勢升級
另一邊廂，一直喺鄉議局專責大浪西灣事宜嘅「新界鄉議局反對將西灣村納入西貢東郊野公園小組」近日決定擴大職權，不但要捍衞大浪西灣，更將保衞全港五十幾幅「不包括土地」嘅重任攬上身。
上次幫手籌備嘅李耀斌，今次更擔任副召集人，唔使講行動肯定升級，遲啲可能連焚化爐同堆填區擴建嘅爭議都喺佢哋嘅捍衞之列。
班鄉紳向來言出必行，唔係得個講字，如果政府仲唔好好同佢哋傾吓，相信一發不可收拾。