中環出更：議員用立會秘道惹爭議

立法會早前辯論引用《立法會（權力及特權）條例》（特權法）要求政府交出審批免費電視牌照嘅文件，大批市民包圍立法會，亦揭發咗立法會停車場原來有條秘密通道通向政府總部。泛民主派立法會議員范國威就去信行政管理委員會（行管會），要求用混凝土將通道永久封閉，但據聞尋日嘅行管會會議上，大部分人都唔贊成咁做。

據了解，原來唔止建制派議員喺辯論特權法動議當日使用秘道離開，甚至有泛民議員都有用呢條秘道。所以班議員作為既得利益者，大家都唔想封閉條秘道。結果明明立法會大樓依家已有多個出入口，班議員都仍然以需要緊急通道為由反對封閉條秘道。

不過，有議員就覺得，呢條秘道會令外界質疑立法會同政府打龍通，損害立法會嘅聲譽同形象，亦有議員又擔心通道會被濫用︰「萬一有議員被人追債，話要開路，唔通又開畀佢咩？」故此，為咗提升呢條秘道嘅透明度，行管會就計劃釐定機制，講清楚咩情況下先可以使用呢條秘道，以釋除外界疑慮。

卓妮