幕門收費加零一 港鐵果然算死草

俗語話「加零一」,即係一百分再加一分,亦即係爆晒燈咁解。例如蠢到加零一、懶到加零一、衰到加零一,咁有冇人縮骨到加零一呢?梗係有啦,港鐵就係嘞!

事情可以追溯至十幾年前。由於墮軌意外頻生,社會要求加裝月台幕門之聲不絕於耳,於是乎,港鐵嘅前身地鐵公司左計右計,前度後度,最後度出一條橋,就係幕門可以裝,不過工程費用就要乘客分擔,由二○○○年起徵收每程一毫子幕門附加費,目標係彌補工程一半費用,即十一億五千萬元。大家話嘞,港鐵算死草,車費收到足,仲要巧立名目刮多一毫子,係咪「加零一」吖?

嗱,古仔未完o架。事隔十三年,港鐵日前終於宣布幕門附加費已經累積收取咗十一億三千萬元,下月起停收,仲話提早兩個月停收可以為乘客慳番二千萬元喎。點知有心水清嘅市民踢爆,過去十三年來,港鐵涉嫌將一毫附加費連同車費一齊加價,以期間五次調高票價計算,複息效應之下附加費至今實際已累升至一毫兩仙,估計咁多年來因此多收乘客三千六百萬元車費。立法會議員質疑港鐵想瞞天過海,要求將多收車費回水,並從車費中額外再減兩仙。

你話港鐵係咪死性不改吖,徵收幕門附加費已經算死草,仲要收到超晒額,係咪發錢寒成咁吖?所謂小數怕長計,收多嘅兩仙車費點計先?嗰三千幾萬不義之財又點處理先?嗱嗱嗱,唔好當冇事發生呀,港鐵事故頻生已經令人忍無可忍o架嘞,如果再被指中飽私囊,侵吞民脂民膏,港鐵總部日日被人圍都似!

咁講啦,幕門附加費爭議不絕,重點唔係一毫子或者兩仙,而係港鐵嘅行事作風實在令人反感。港鐵作為公共事業機構,而且港府仲係大股東添,可惜唔係以民為本,而係唯利是圖,車費唔止收到足,仲要收到「加零一」,唔被人話為富不仁至奇啦。講到為富不仁咯喎,就不得不提呢筆,港鐵以可加可減機制為藉口,年年賺大錢,年年勁加價,呢種對市民予取予求嘅貪婪所為,何止縮骨,簡直無良。

最奇怪嘅係,人哋一分錢一分貨,而港鐵就一分錢半分貨,愈係加價,服務質素就愈差。就講幕門附加費吖,錢收晒,但係東鐵線幕門最快要到二○二○年至完成,咁簡單嘅工程都要等七年,簡直仲難過探測火星,問你服未。

所以話,一滴水看世界,一毫子睇盡港鐵嘅涼薄。無論點都好喇,港鐵盆滿缽滿,應該夠皮啦,多收嘅車費唔該回饋乘客,速速磅,唔好兩頭望!