立法會下月初將辯論由環境局提出將大浪西灣村納入郊野公園範圍嘅修訂令，新界鄉議局執委會日前決定動員二千名村民一連三天包圍立法會抗議。尋日內務委員會會議上，議員劉慧卿就擔心當日會爆發衝突，呼籲村民和平理性進行示威，但就畀議員陳鑑林（橄欖）寸番轉頭，話月初撐香港電視網絡嘅示威者一樣包圍大樓，並向建制派議員施壓，當中黨友黃定光（象哥）仲被人用粗口問候添。
橄欖話，當日有大批示威者霸佔立會對出馬路，部分人士仲拍打建制派議員座駕阻止佢哋離開。橄欖之後仲用諧音幫象哥出頭，話象哥已經係「粗（出）口界」（進出口界）代表，但當日如常外出煲煙時，仍然慘被人用粗口問候娘親，認為示威者咁做可謂非常離譜。佢咁講即係暗批泛民處事持雙重標準，寬己嚴人。
另有議員就話，如果卿姐連幾千人到立法會示威都咁擔心，咁佔領中環行動聲言會有幾十萬人參與，咁咪會更加令人擔心？鄉議局主席劉皇發會上唔肯透露鄉民包圍立法會示威嘅部署，淨係懇求議員支持佢嘅修定，將大浪西灣村剔出郊野公園範圍。