政情：白韞六外訪 唔係講玩
「貪湯」前廉政專員湯顯明在任時豪花公帑，藉外訪之名遊山玩水，結果被立法會政府帳目委員會公審外，廉政公署亦對佢展開調查。現任廉政專員白韞六近日去咗美國同巴拿馬共和國訪問，並出席國際反貪會議，為咗撥亂反正，白韞六今次外訪好有交帶，除咗發新聞稿交代佢同隨行人員嘅外訪活動詳情、同咩人會面之外，仲上載埋照片等大家有相為證添，相信都係為咗省番靚廉署個金漆招牌。
上載與美高官會後合照
帳委會下周三就會向立法會提交調查貪湯外訪、公務酬酢及送禮開支嘅報告，除咗強烈譴責貪湯外，帳委會亦會對縱容貪湯豪花公帑買酒、送禮、亂開單嘅廉署同廉署社區關係處處長穆斐文予以譴責。偏偏呢個時候，白韞六就同穆斐文雙雙離港外訪，仲要到下周三先返港添。不過，白韞六為證明同穆斐文唔係去玩，尋日就出新聞稿又出相片做證明，同貪湯當年去咗遊山玩水都冇人知嘅情況截然不同。
今個星期日已經啟程嘅白韞六先去美國同當地嘅執法機構、司法機關、政府部門同設喺美國嘅一啲國際組織會面，又同佢哋講解香港喺建設廉潔社會同營商環境工作嘅進展。所謂「有圖有真相」，廉署就將白韞六同美國司法部副總檢察長James Cole、紐約市調查局局長Rose Gill Hearn、及世界銀行副行長Leonard McCarthy嘅不同合照放上網。
特登提及穆斐文將演講
而白韞六同穆斐文尋日就結束美國行程，出發去巴拿馬城，出席國際反貪局聯合會第七次年會暨會員大會。除咗白韞六有專題演說外，新聞稿仲特登提及穆斐文喺會議工作坊亦有主題演講，好似想話畀人聽穆斐文並唔係逃避譴責，而係真係要做嘢。其實又好難怪白韞六交帶得咁鉅細無遺嘅，事關貪湯在任廉政專員期間外訪雲南就變咗去麗江遊覽玉龍雪山，外訪四川又變成睇樂山大佛，就連香港嘅案件佢都懶理，認真敗壞廉署聲譽。