中環出更：作品多籮籮 曉暉拒絕「藏拙」
香港畫廊協會主辦嘅首個香港畫廊周日前正式揭幕，城中藝術愛好者齊集，包括舖王鄧成波孻仔鄧耀昇（Stan）同未婚妻葉靄璇（Vicky）、民政事務局副局長許曉暉（Florence）、體育、演藝、文化及出版界立法會議員馬逢國等。Florence話，佢兩個囡囡都有習畫，同佢一樣都係嶺南畫派，但囡囡嘅畫作仲未去到擺放喺畫廊展出嘅水準，希望將來有機會喎。
相信下次畫得更好
至於Florence自己嘅藝術創作包括書法、畫作多籮籮，問佢點樣收藏，佢就話多數丟棄，只保留極少作品，事關佢總係覺得下一次會寫到或畫得更好喎，呢種學習態度認真積極。當日佢到場係為咗支持香港畫廊協會聯合會長徐錦熹，因為佢哋都係銀行家出身，都係半途因為追求理想而轉型，所以特別惺惺相惜。
至於馬逢國就話，香港有好多水準唔錯嘅本地藝術家，需要多啲藝廊配合，而政府亦需要支持多啲藝術活動。不過，佢笑笑口話自己對畫作只係門外漢，既冇收藏亦冇習畫，事關佢一直做電影幕後工作。同場嘅Stan就笑笑口報喜話，佢將於明年三月舉行婚禮，有關婚禮細節已交晒畀做婚禮籌辦生意的Vicky話事。
徐錦熹話，香港有大約一百家畫廊，協會成立目的係匯聚業界力量，推動本港畫廊社區嘅發展。佢話，香港已係全球第三大藝術品拍賣市場，但仍未有足夠的本地收藏家，究其原因，一句講晒，係文化底蘊唔深，所以佢哋希望透過香港畫廊周嘅一系列活動，帶動香港人參觀畫廊嘅風氣，唔好只係行街購物喎。
卓妮