有友戲問：澳門施政，只得一招——就係派錢，你這「資深時事評論員」怎睇？老朽原想以「三個字」噴之：不予置評！諗落，既在全港銷量冠軍嘅報紙發聲，又怎可以咁龜縮呢！腦袋幾殘幾乾，未入水點都要抒發幾句嘅！
講真，澳門連續第七年派錢，而且愈派愈豪，今次其永久居民獲派九千大元，馬交朋友想唔做土豪都難！香港雖然同樣庫房水浸，之不過一味「應使得使」，回歸以來民怨沸騰、有政黨聲討下才死死氣氣地派過一次六千蚊咁大把，之後就聲沉影寂，政府一直強調民生冇小事，成立迷宮咁多「扶貧」乜乜會，淨係劃條「貧窮線」，一劃都要逾年，總之就係不能如o靚模之事業線，一唧一夾就有，只能這樣解嘲吧，o靚模有神奇胸圍而政府沒有神奇之手！
江湖救急，派錢最實際，香港貧窮人口，回歸十六年以來有升冇減，政府宣傳短片一味描畫遠景，阿哥，一隻秋後的螞蚱掰着手指頭算，也算不出多少個秋天，臨渴掘井，不如即時畀支蒸餾水到位，唉，一如等你中了六合彩頭獎才給我一百萬，不如即磅五十財等餓者解決兩餐吧！
老朽是一萬年太久只爭朝夕嘅信徒，當前香港民怨爆煲，政改爭拗不斷，佔來佔去，難道真可以佔出個未來？
爛果報又話人哋施政失民心，特首掟一百三十億「掩口費」博連任，咁又有乜錯啫？晚清中興名臣曾國藩話齋：「凡善弈者，每於棋危急之時，一面自救，一面破敵，往往因病成妍，轉敗為功。善用兵者亦然。」
明顯澳門施政，特首就係善用兵，派錢做土豪，在棋局危險的時刻，一邊自救，一邊攻敵，往往能夠像因為生病而調養得更加妍麗的情況一樣。
咱們土豪有力量，總好過一味畫餅充飢吧！派錢萬歲，明年澳門再派錢，相信馬交朋友個個即時成萬元戶，袋裏冇一萬幾千點出來威，你又吹得我脹咩！