商業電台尋日宣布旗下時事議政節目有人事變動，商台行政總裁陳志雲下周一起會開咪，主持《在晴朗的一天出發》，而原來主持呢個節目嘅李慧玲就會被叮走，調返去主持黃昏時段播放嘅《左右大局》。有人就質疑調動同商台續牌有關，但陳志雲就話牌照二○一六年先至到期，仲未開始討論續牌問題，叫大家唔好太敏感喎。
商台開記者會交代人事變動期間，有人就質疑佢哋係為咗續牌而調走經常喺節目批評政府嘅李慧玲。不過，陳志雲就強調同續牌無關，只係喺呢個面對大是大非同挑戰嘅年代，佢哋要投入更多資源去提升議政能力。對於有人話有關調動係為咗取悅政府，佢就話呢個傳聞令佢好困擾同唔開心喎。
李慧玲尋日原本要返商台開工作會議，但最後都冇去到，而佢夜晚就喺社交網站留言，話今時今日嘅香港應該有心理準備任何事情都可能發生，仲話佢會留守到最後一分鐘，多謝大家關心咁話。