政情：特權法照妖 蠱惑仔現形
建制派向來唔係鐵板一塊，有時為咗進佔泛民主派政治光譜，都會扮演唔同角色，有人做乖仔附和政府、有人專做曳仔同政府唱反調，但到大是大非投票時刻就要乖乖歸隊支持政府。好似最近泛民議員要求引用《立法會（權力及特權）條例》（特權法）調查免費電視發牌事件，由於可能動搖到行政會議行之有效嘅保密制及政府管治威信，特權法就好似一塊哈哈鏡或照妖鏡咁，即時照出立法會嘅真假曳仔議員。
有建制派人士透露，今次立法會引用特權法，政府只向幾位未表態嘅功能界別議員埋手，除咗一早就放棄向直選嘅謝偉俊（Paul）箍票外，仲特別放棄埋同電視業界有關嘅體育、演藝及文化出版界馬逢國。據聞政府認為阿Paul早已表態撐泛民，甚至願意拋個身出來參與泛民聯署，所以當局由頭到尾都無重點游說佢。至於馬逢國就因為業界有極大壓力，政府當初估計佢有機會撐泛民，所以只係象徵式同佢傾吓。
力保行會保密制及管治威信
之後政府集中火力向工業界林大輝、保險界陳健波等功能界別議員埋手，經過一輪游說後，據聞政府計過就算無咗林大輝一票，都依然夠票反對泛民動議，但佢哋就無預料阿Paul同馬逢國都要雙雙歸隊投棄權票撐政府，亦令唔少建制派人士錯愕。有建制派人士認為，特權法有機會動搖到行會保密制及政府管治威信，大是大非當前，自然要乖乖歸隊支持政府，今次投票結果亦反映阿Paul只係扮曳仔，避免下屆選舉盡失建制派地區樁腳。
林大輝自由黨寧願做真曳仔
至於自由黨同林大輝方面，據聞就算撐政府都未必有分加，所以寧願做真曳仔撐泛民動議。不過，作為建制派做真曳仔咪死路一條？有知情人士話，自由黨做曳仔只係不滿現屆政府，如果去到佔領中環行動等敏感議題，絕不敢越雷池半步，大輝都係一樣。既然咁夾，大輝係咪應該快啲入自由黨？咁又未必，雖然雙方理念相近，但經過今次免費電視發牌風波，發現分開發展可以有更高曝光率。所以話呢，無論真曳仔或假曳仔，其實都係蠱惑仔！