中環出更：議員亂設小組會 「洗腳唔抹腳」
為方便議員就唔同範疇嘅政策進行討論，立法會事務委員會轄下可再成立專門研究政策事宜嘅小組委員會。不過，今屆立法會只係運作咗一年，小組委員會數目已經超出原定八個上限之餘，仲有至少四個小組委員會喺輪候名單上排緊隊。點知班議員個個都話自己嘅小組委員會好重要唔摺得，但被內務委員會主席梁君彥寸佢哋「洗腳唔抹腳」，亂開設小組委員會。
梁君彥寸爆同事
內務委員會尋日討論延長小組委員會工作期嘅建議，工聯會王國興話自己嘅長遠房屋策略小組委員會仲有好多工作未做，名副其實洗頭洗咗一半。議員鍾樹根又話自己嘅監察西九文化區計劃推行情況聯合小組委員會，已經擬定好議程，得番三個月唔夠時間開會。
梁君彥聽到後即時寸爆佢哋，話如果秘書處再唔制訂機制規定小組委員會完成工作時限，其他輪候中嘅小組委員會就唔可以開展工作。最後佢規定所有進行中嘅小組委員會最多只可以喺期限屆滿後延長三個月，而日後所有事務委員會轄下最多只能成立兩個小組委員會，多出嚟嘅就要排隊慢慢等喇。
卓妮