美國總統奧巴馬推行醫療改革法案，竟然導致幾百萬人失去原本購買嘅醫療保險。於是乎，呢一個地球上最有權勢嘅總統大人惟有一臉尷尬，向受影響民眾表示歉意。
強如美國搞醫保，尚且搞到爭議不休，弱不禁風嘅特區政府搞醫保，將會搞出乜嘢後果呢？自願醫保顧問報告最快會喺年底公布，未出爐已經有一把相當有分量嘅反對聲音。再過冇幾耐就卸任醫管局主席一職嘅胡定旭話喎，對於自願醫保計劃有保留，即使真係推行，如果私家醫院資源不足都係冇用。胡定旭建議，不如推行強制性醫保計劃，第一年由政府提供保費或其他經濟誘因，其後逐年減少。
聽到胡定旭嘅講法，食物及衞生局局長高永文就話嘞，政府從來冇假設自願醫保計劃可以解決所有問題，強調會保持公私營醫療雙軌並行嘅制度，以公營醫療為安全網。高局長重申，目前提出嘅自願醫保計劃屬於輔助性質，希望吸引有能力嘅市民更多選擇使用私家醫院。
講到呢度，大家可能有一個疑問，究竟私家醫院嘅資源足夠唔足夠應付病人需要o架？不如咁啦，睇睇幾個相關數字。衞生署一○年至去年接獲私家醫院呈報五宗涉及三人死亡嘅嚴重醫療事故，去到今年情況變本加厲，七至九月期間已經有四宗由於失誤而造成嘅死亡個案。最死得人多嘅係九月，短短一個月之內居然有三名病人蒙難。
「東方報業民意調查」結果顯示，三成六受訪者感到私家醫院服務質素冇保障；三成憂慮病人增加導致私院質素下降；兩成五質疑私院壓力爆煲。
既然自願醫保計劃係將病人從公立醫院推向私家醫院，受訪者又點睇呢？三成九擔心自願醫保變成搵笨醫保，物非所值；三成三憂慮私院冇能力應付需求，將會步公院後塵；兩成五覺得會減低自願醫保嘅吸引力。
即係咁，如果唔係公立醫院做到裙拉褲甩，醫護人員長期七個蓋冚十個樽，手忙腳亂害到不少病人枉死，官老爺都唔會拋出自願醫保計劃，企圖由私家醫院分擔沉重嘅壓力。之不過問題係，若然私家醫院同樣係資源不足，試問又點樣保障病人嘅切身利益呢？喂，今年七至九月有四個病人死於私家醫院嘅失誤喎，你叫小市民點敢將條命仔交託畀又忙又亂嘅黃綠醫生呀！
所以計功夫茶話齋，唔理你推出嘅係自願醫保計劃抑或係強制性醫保計劃，歸根究柢必須首先改善成個醫療系統，若然人手依然不足，加上醫保計劃粗疏，後果將會係六個字：照舊死得人多！