政情：立會宴會廳食物 議員大呻唔掂
立法會議員成日都喺立法會開會，宴會廳食物質素可謂非常重要。不過，近來愈來愈多議員「拒食」宴會廳逢星期三提供嘅自助餐，仲連平時都好少再宴請業界人士同選民嚟立法會食晏，話費事人哋一場嚟到立法會，但都係食埋晒啲質素麻麻嘅菜式，失禮死人。
姚思榮：一次難食過一次
旅遊界議員姚思榮曾經兩度邀請業界去立法會宴會廳食飯，佢話覺得供應商選擇唔多之餘，啲食物仲要一次難食過一次，又話宴會廳最低消費每位都要成二百幾三百蚊，理應提升食物質素，甚至整返一至兩味拿手小菜。又有議員話，宴會廳提供嘅菜式又貴又唔飽，所以情願捱肚餓都唔去宴會廳食飯，又話無試過請人去立法會食飯，寧願喺出面食咗飯，再帶佢哋返立法會參觀。
秘書處解釋，立法會議員每餐膳食有既定預算，所以供應商都唔多願意提供到會式服務。不過，佢哋即管向膳食供應商反映議員嘅意見，盡吓人事希望食物質素有所改善。