政情：冇「橋」變臉林鄭催DO
政務司司長林鄭月娥號稱「好打得」，尋日由屯門民政事務專員（DO）陪同出席一個活動，忽然向DO問書兼施壓，佢問點解一條行人天橋要起兩年咁耐，嚇到嗰位DO當堂面青。其實林鄭做過發展局局長，熟悉政府程序，無理由唔知道起一條橋要經好多個程序，唔係話起就起。如果佢嫌耐，就應該喺政府內部做起，加快程序喇。
屯門天后廟廣場尋日舉行揭幕儀式，請到大批鄉親同林鄭出席，典禮完成後林鄭視察廣場四周，由屯門DO劉淦權同一班地區人士陪同。當佢哋去到屯門河附近，林鄭隨口問下係咪呢個位置興建行人天橋，仲問條橋幾長。DO答話唔係好長，之後林鄭好似對條橋好有興趣，再問DO條橋幾耐至落成，對方就答要兩年。
不滿建行人天橋等兩年
聽到呢個數字後，和顏悅色嘅林鄭即時面色一沉，托一托副眼鏡、憂心忡忡咁話：「吓，要兩年咁耐？」企喺隔籬嘅DO見林鄭面色不悅，有啲尷尬，好彩佢都有急才，打圓場話其實起條行人天橋好快，但計埋招標程序先要兩年。雖然叫做有解釋，但林鄭明顯唔太滿意，不過礙於現場有大批市民圍觀，林鄭只能勉強展露笑容，笑笑口咁向DO發出命令，叫佢年底前進行招標，以免拖太耐。
年底前，即係剩番一個月啦，DO真係要快啲做嘢喇。急市民所急當然好，但負責起橋嘅都唔係DO，如果林鄭將意見帶返政府，全面加快內部嘅基建程序，咁每一區起天橋都可以加快啦。
鏡頭前與發叔互笠高帽
林鄭難得入到屯門，鄉議局主席劉皇發當然要盡地主之誼，兩人喺鏡頭面前雞啄唔斷好好傾，致詞時仲互送高帽，發叔話多謝政府關心屯門，林鄭就話發叔好支持特區政府，就咁聽以為兩人老友，但諗真啲就記得早幾個月堆填區擴建風波，發叔大鬧政府有乜都推晒畀屯門，照咁睇發叔句說話似乎係有骨多啲。本來發叔都陪同林鄭參觀天后廟廣場，但去到廁所附近，發叔已經唔見咗，疑似借尿遁，幾絕！