中環出更：巧遇小學同窗 黃錦星喜合照
環境局局長黃錦星尋日出席環保跑步活動時，突然拉住個生面口嘅女參加者合照，仲顯得非常之興奮添，究竟佢係邊個？原來係局長起碼三十幾年無見嘅小學同學！喺舊同學眼中，當年嘅黃錦星係叻同英俊喎。
三十幾年冇見
黃錦星呢位舊同學姓黎，對於被稱讚當年叻同英俊，黃錦星就笑笑口話，自己成績名列前茅係真嘅，當年讀中華基督教會基慈小學，同呢位黎同學係鄰居兼玩伴，大家喺屋邨住埋同一層，放咗學會一齊跳繩玩遊戲，非常開心，估唔到卅幾年無見，竟然會喺環保活動巧遇。
黎同學話，局長小學時已經係叱吒風雲嘅風紀隊長，不過就好好人，從來都無捉過佢犯校規。局長聽到就有啲尷尬，力證自己做風紀隊長時「執法好嚴謹」，唔知係咪想暗示自己處理堆填區滲漏事件時，對承辦商都唔會手軟呢？
扮演番局長嘅角色，黃錦星答問時就話，打鼓嶺堆填區污水池已經復修好，缸窰河水質唔達標但污染情況有改善。至於已復修的望后石谷堆填區被揭丟空多年，黃錦星話會尋求機制令已復修堆填區盡快畀市民使用。
卓妮