中環出更：趙式慶 王嘉恩談刀論劍
中華國術總會主席趙式慶同埋會長王嘉恩醉心武術，佢哋認為刀劍背後充滿文化內涵，值得向同好推廣，於是早前佢哋舉辦武術沙龍，除咗邀請武林高手示範雙手刀技法，仲羅列咗幾把代表唔同時代刀劍嘅複製品，論盡呢兩種經典兵器嘅歷史源流。
聽趙式慶講，劍嘅歷史比刀更為悠久，早於春秋戰國就有唔少名劍嘅記載。雖然漢朝之後刀取代咗劍於軍事之中扮演嘅角色，但象徵權力嘅劍，還是流傳於公卿將帥，同埋詩人俠客之間，從而衍生一套文化禮儀，其後被日本所吸取，繼而發揚光大成為人盡皆知嘅劍道。趙式慶又話，中國人長久以來都未有珍視刀劍背後嘅文化寶藏，文革時期更大肆摧殘，令到好多有歷史烙印嘅刀劍都不復存在，連帶舞刀弄劍嘅技法亦失傳。
王嘉恩就話，中日兩國對待刀劍嘅態度好唔同。例如中國嘅鑄劍師向來不見經傳，而刀劍嘅質量亦有改善餘地。反觀東瀛，鑄劍師係廣受尊重嘅行業，鑄劍師為咗不辱名聲，製作過程都傾盡心血，務求精益求益。正所謂禮失求諸野，王嘉恩話日本人對待刀劍嘅認真態度實在值得學習。
武術沙龍 展出珍藏
愛好刀劍收藏嘅王嘉恩，於今次武術沙龍之中展出珍藏嘅唐刀同東洋刀。佢話研究刀劍之道，猶如玉石鑑賞，佢多年以來收藏嘅刀劍為數超過半百。
至於今次活動嘅坐上客，前青商會主席李騰駿（Timmy）就話在場嘅刀劍好有歷史感，仲好欣賞當中一把楚國青銅劍。青聯副主席黃夢瑩（Monin）就話武術沙龍對佢好有啟發，仲有意以劍客為題，作為下一齣話劇嘅創作藍本。
卓妮