政府公布免費電視發牌結果之後，民情洶湧，社會唔少聲音都質疑結果係咪涉及政治因素，但政府一直又未予更清楚解釋。直至前日，權威消息人士向本報解釋話「搞電視唔係選美，而係選老婆」，強調電視發牌唔可以只睇初期投資，行政會議召集人林煥光尋日早上先喺電台節目話「經營電視台唔係搞茶餐廳」，人手同投資都好巨大。呢啲比喻對市民大眾嚟講，咪顯淺易明囉，如果早啲解釋得咁清楚，係咪會好啲呢？
