財政司司長曾俊華（鬍鬚曾）尋日發表嘅網誌，話政府總部上個周末全日充滿火藥味。唔講仲以為政府內部就政策有唔同意見，嗌到好僵，原來佢係講緊上星期到政府總部外取景嘅《變形金剛》拍攝工作。鬍鬚曾仲話，其實當年曾買過一個香港製造嘅博派機械人玩偶畀囝囝，後來先知道自己幫襯咗立法會議員林健鋒嘅家族公司。
財爺尋日上載上網嘅呢篇網誌題為歡迎Bumblebee（大黃蜂），除咗上載咗幾幅《變形金剛》喺添馬公園拍攝情況嘅照片，仲話其實以往唔少外國電影都曾經來港取景。佢話港府為協助電影業，喺九八年成立電影服務統籌科，並喺○九年就納入商務及經濟發展局轄下嘅創意香港辦公室，繼續協助製作公司在港進行外景拍攝。不過鬍鬚曾講到《變形金剛》上月喺香港拍攝時發生嘅不愉快事件，佢就話好彩無影響電影拍攝進度同香港整體形象，睇嚟鬍鬚曾唔太滿意今次統籌科嘅表現喎！