政情：陳淨心另起爐灶反佔中
曾經係愛港力風頭人物嘅陳淨心，自從退出愛港力後沉寂咗一輪，最近「火鳳重生」，成立咗個叫「愛港行動」嘅新組織，標誌仲係一隻飛緊嘅鳳凰。尋日係愛港行動頭炮，陳淨心帶埋廿名成員到大窩口一間教會，向參加論壇嘅佔中發起人戴耀廷示威，批評佔中運動勾結台獨份子施明德，質疑佔中想顛覆分裂國家。
「愛港行動」廿人示威
愛港行動組織都幾嚴謹，佢哋特設公關部應付傳媒，透明度比以前愛港力高好多，而且個個都好聽陳淨心講，一聲令下已經企晒喺佢後面，好有隊形。而且第一次行動就搵到廿幾人去抗議，算係唔錯。
陳淨心批評佔中成員勾結台獨份子，證據係發起人之一嘅朱耀明與民進黨前主席施明德會面。但記者再問落去，陳淨心就話其他嘢唔識，只知朱耀明見過施明德。咁又係，其實陳淨心只係一介市民，好似佢尋日件衫左胸印有皇冠標誌，皇冠係西方帝制主義產物，唔通咁就證明到陳淨心勾結外國勢力，留戀殖民地咩？