政情：雙貪影衰 廉署借BB挽聲譽
廉政公署出年就四十歲，不過近年「貪曾」前特首曾蔭權爵士同「貪湯」前任廉政專員湯顯明先後捲入貪污醜聞，提早為廉署「賀壽」，當中貪湯超豪外訪、送禮、請客更加打爛廉署嘅金漆招牌。廉署為咗挽回聲譽，今日推出新一輯廣告，由上一輯雞蛋「進化」到用BB做主題，但就堅稱廣告同任何案件無關。
今推新一輯廣告
廉署新廣告嘅標語喺「發展各異，訴求一致，為下一代，共建廉潔將來」，廣告拍攝唔同BB神態，有笑有喊有踢腳仔，從中「估計」佢哋將來做咩職業，例如歌手、武打明星等，寓意下一代無論做邊行，都需要廉潔社會。無獨有偶，其中一個BB就估佢將來會加入ICAC，問到用意喺咪告誡廉署人員咪學貪湯咁，廉署社區關係處助理處長何渭枝就解釋雖然廣告喺爆出貪湯醜聞之後拍，但絕對同任何案件無關，只係一個廣告噱頭喎。
何渭枝話，七四年廉署成立嗰陣，第一個廣告喺一位太太抱BB去舉報貪污，新廣告又用BB做主題，正好喺一個呼應。