政情:星爺學剪布 怕鬆緊懸殊

立法會復會無耐,暫時未見有乜爭議性議案擺上財委會審議,但立法會「拉布」成風,相信新任財務委員會主席吳亮星都有晒心理準備。星爺最近就話自己好勤力溫書,重溫晒以往立法局年代,財委會主席面對冗長發言時有咩裁決,星爺話甚至參考埋外國議會做法。不過有一樣主要考慮,就係要睇立法會主席曾鈺成嘅做法,因為如果星爺同曾鈺成「執法」鬆緊懸殊,議員以至公眾都會無所適從。

星爺早幾日同我哋講,話去年財委會經常拉布,已經有唔少議員要求上任財委會主席張宇人剪布,今年到星爺做主席,佢話一定會畀足時間大家議政,但佢亦唔會手軟,如果發現審議期間出現不利公眾嘅場面,佢一定阻止。

參考中外例子

但剪布要「出師有名」,唔係鍾意剪就剪,最近佢就叫立法會秘書處幫手搵資料,搵番立法會、甚至回歸前立法局年代,當財委會主席遇上有議員不停重複發言,到底主席點裁決,就算連外國議會都有參考。星爺話幾經努力,終於搵到案例點樣阻止議員不斷重複發言,但佢話「賣關子」唔講住,保留神秘感喎。

雖然星爺諗到計阻止議員重複發言,但現時「拉布」招數五花八門,議員可以提出幾十萬個修訂,就算每個修訂講一次已經拉到天荒地老。星爺就話,如果面對無聊瑣碎修訂,例如將個年份或數字改一改就當新修訂,呢啲修訂其實無乜用。如果議員提出小量修訂都算數,但一旦有人提出數以千計、甚至萬計呢類改動極小嘅修訂,佢話未必批准提出,因為咁做會浪費大家時間、浪費公帑,無人得益。

星爺強調自己相信一個道理,就係「鬆咗就好難緊番」,為免自己就揸得好緊,而曾鈺成就好鬆,到時兩人唔一致就好肉酸,所以佢都會約曾鈺成見面,睇下點樣將大家條線拉得近啲。

其實都係公道自在人心啦。如果星爺嘅剪布係獲得市民認同,相信佢點剪都無人怪佢,但如果係爭議性議題,官員交代得唔清唔楚,星爺亂剪布,自然就惹來市民批評。

第一手消息請下載on.cc東網iPhone/iPad/Android/Windows Phone Apps