政情：高佬賢開議辦 小漁船出動
漁農界立法會議員何俊賢（高佬賢）尋日再有辦事處開張，唔單止高佬賢細佬同舅父嚟捧場，仲有唔少業界翹楚出席，連隻燒豬都係由業界贊助，加埋舉辦開幕禮會場內放住嗰隻本來擺放喺大埔社企「水陸墟」嘅縮細版漁船，真係一睇就知係漁農業界嘅盛事。
據在場主禮嘅新界社團聯會理事長陳勇透露，原來呢隻小漁船係七年前水陸墟開張時，一眾漁民搵船廠打造嘅，係絕版且無價喎，而小漁船上面除按比例設有微型廚房及廁所位置，仲真係可以浮喺水面，同一般漁船冇咩分別，所以若載住高佬賢出海都完全冇問題咁話。
出席開幕禮做主禮嘉賓嘅食物及衞生局局長高永文就食燒豬食得津津有味，仲話外脆內軟好好味添。不過，當提及新鮮豬隻，高醫生即時攞出手提電話，話自己每日下午五點鐘，都會睇實新鮮豬隻及牛隻嘅入口紀錄，賣出及賣剩數量，又會留意住大、中、小豬嘅拍賣情況，以確保香港有充足牛隻及豬隻供應量。高醫生咁關心豬牛隻嘅出入口，證明佢一定唔係懶豬啦！