中環出更：史立德贈良駒 賀愛女牛一
前仁愛堂主席史立德（Allen）唔淨止係愛妻號，仲係廿四孝爸爸。尋日Allen同太太史顏景蓮、兒子史昊洺及女兒史佩加（Kathleen）齊現身沙田馬場，為佢哋名下嘅三匹出賽愛駒打氣，其中一匹「好加加」屬於Kathleen名下，首次出賽即跑第四名。Kathleen甜笑話，愛駒係爸爸送畀佢嘅生日禮物，認真有心思。Allen話，最初佢送咗隻馬畀囝囝，今年囡囡同佢參加馬匹拍賣會時詐型，於是佢就買埋匹「好加加」畀個女做生日禮物，一人一隻唔使爭。
尋日係莎莎婦女銀袋日，名媛靚太紛紛戴上各式各樣嘅禮帽入場，當中以前教育局局長孫明揚太太鍾小芬嘅橙色「禮帽」最特別。孫太話，佢早前與家人到日本旅遊期間，睇中呢頂價值一百多港元嘅帽子，諗都唔諗就買咗，點知返香港戴畀家人睇，女婿竟然笑佢頂帽似浴帽！
人氣拉麵店老闆鄧振豪（Chandler）同拍拖一年多嘅模特兒女友Giselle都喺度，Chandler向卓妮宣布喜訊，日前向女友求婚成功，已定於明年底共諧連理，真係恭喜晒！
偕「豹妹」到場 貪曾子黑面
「貪曾」前特首曾蔭權爵士嘅細仔曾慶淳都嚟咗，身邊仲有同佢喺街邊「激攬」畀《好報》發現嘅「富貴豹妹」Vivien。不過曾慶淳同社交界無乜兩句，見到記者又周身唔自在，本來想去沙圈睇馬，結果都自行彈走。見佢面部無乜笑容，可能唔多享受入馬場玩。
卓妮