減速壆損毀 屋邨維修慢
路面損毀影響行車安全！上水天平邨天平路出入口設有減速壆，但已損毀多時，管理公司至今仍未維修，居民馮先生指減速壆與附近道路凹凸不平，嚴重影響行車安全，要求盡快維修，「減速壆本來係凸起，依家有一邊凹咗落去，反差咁大，駛過會拋得好勁，架車仲可能會失控！」
管理公司被指拖延
天平邨管理公司發言人稱，業主立案法團早前向政府申請於上址安裝車閘系統，需待部門批核才可進行工程及維修路面。有關工程現已獲批，管業處會盡快開展有關工程，並維修路面減速壆。
「裝新閘同維修路面根本就係兩樣嘢，依家咁講係咪即係政府唔批就唔維修？」馮先生坦言對管理公司的回應大表不滿，認為管理公司以政府審批作藉口拖延維修，要求盡快開展維修工程。