政情：公民講場：「注射」定義 「高」深解釋

政府尋日公布「私營醫療機構規管檢討督導委員會」報告，建議規定任何涉及「注射」嘅美容程序，今後只應由註冊醫生進行。食物及衞生局局長高永文介紹有關建議時，特別強調「注射」唔單只等於「打針」，而係包括所有「將藥物或其他物質注射入人體之內」嘅行為。高永文講得咁冗贅，原因係美容業除咗打針之外，仲有一種俗稱「無針注射」嘅高壓式注射，督導委員會認為有一定風險，需要同打針一樣當作醫療程序規管。不過，同樣涉及打啲嘢入體內嘅「灌腸」，委員會又唔將佢定義做「注射」，真係聽到市民一頭霧水！