立法會議員梁國雄（長毛）上星期日同林大輝踢波時不慎受傷，導致左腳骨裂，原本要留院六星期接受治療。不過，坐唔定嘅長毛又點會甘心被困醫院吖，佢尋日就坐住輪椅負傷返立法會見吓啲同事，點知就被人笑佢係「天殘腳」，議員張超雄仲笑佢話立法會突然多咗個殘疾人士添，長毛只好以笑回應。
戰鬥力大減嘅長毛尋日坐住輪椅，由黨友黃浩銘推住返立法會。雖然長毛無去到開內務委員會會議，但佢就喺二樓撞到一班啱啱開完會嘅李卓人（阿人）、張超雄同人民力量陳偉業（大舊）。大舊先係慰問長毛傷勢，之後又指住長毛隻左腳話係天殘腳，之後又講笑話：「林大輝叫你踢波你又去！」
而工聯會王國興平時經常拎住隻血淋淋嘅假腳道具到立法會，問政府幾時先肯推行單肢傷殘津貼，阿人就話長毛依家得番一隻腳，一定符合王國興所講嘅要求喎。