政情：鼓勵投票 雷鼎鳴叫派錢
香港嘅選舉投票率一直都偏低，「幫港出聲」就話得咁少市民投票，投票結果係咪反映民意真係令人懷疑。為咗令香港沉默嘅大多數都發表意見，提高投票率，佢哋嘅教授團代表、香港科技大學商學院副院長雷鼎鳴就向政府獻計，建議實施強制性投票制度，如果選民去投票就可獲派五百元鼓勵。雖然呢條橋可以提升投票率，但政府同建制派係咪支持谷高投票率呢？
「幫港出聲」昨開簡介會，雷鼎鳴就話，依家香港約有五百五十萬人合資格做選民，登記選民就有三百四十七萬七千人，而去年立法會選舉有投票嘅僅得一百八十三萬九千人，投票率得三成三，質疑選舉結果係咪反映到民意，倡實施強制性投票推進民主。
倡每人派五百元
其實依家有廿幾個國家實施緊唔同程度嘅強制性投票，有啲會以罰款、取消選民資格、唔准用公共服務等方式懲罰啲唔做選民或唔投票嘅人。不過，雷鼎鳴就覺得講到罰罰聲大家都唔會鍾意，所以如果派錢嘅話就皆大歡喜喇。佢仲計埋，如果有五百萬人投票，每人派五百元，都係使二十幾億元，又可令人盡公民責任，好過無目的齋派六千元咁話。