政情：鬼打鬼 泛民插「范毛」
立法會議員范國威（Gary）、公民黨毛孟靜（阿毛）等人喺兩個月前喺報章刊登聯署廣告，提出「源頭減人」言論，指摘大量內地新移民來港會加重香港資源負擔。該廣告即時引來社會各界猛烈抨擊，狠斥兩人不擇手段咁賺取政治本錢，要求佢哋收回言論兼道歉。泛民主派同民間團體尋日仲召開聯署記者會發表反歧視聲明，擺明就係想同佢哋劃清界線，避免事件燒埋身，結果演變成泛民內部鬼打鬼互插。
聲明針對性 劃清界線
Gary同阿毛組成嘅「香港本土」原定尋日五點鐘開記者會，死撐「港人優先」政策無歧視新移民。不過，包括劉慧卿在內嘅泛民二十位議員，聯同十個民間團體就搶閘早一個鐘開記者會，發表「爭取家庭團聚審批權」四項聯署聲明，當中一點表明社會應該要以包容、公義嘅原則對待新來港人士，唔應該將佢哋視為掠奪香港資源嘅負累，好明顯係針對Gary同阿毛兩人。
話說班泛民議員喺記者會上無「開名」鬧爆Gary同阿毛，只係以「有同事」三個字來代替，而阿毛嘅黨友梁家傑都有參與聯署，完全係大義滅親。工黨張超雄都忍唔住訴心聲話咗兩人幾句，佢話過去一齊做過唔少工作，如今搞成咁覺得非常可惜，又話自己原則上同意港人優先政策，但絕對唔可以有排外同歧視心態。「長毛」梁國雄就向兩人送上披頭四John Lennon嘅名曲「Imagine」，寸爆佢哋唔尊重新移民。
Gary死撐關注重心唔同
Gary同阿毛喺一小時後舉行記招，發表另一個差唔多嘅聯署聲明，但就刪去「包容新移民」嘅字眼。被問到泛民多數人對佢哋嘅批評，Gary就死撐話兩派關注問題重心有所不同，唔覺得泛民聯署係衝住佢哋而來。阿毛就話泛民嘅言論唔代表大多數港人嘅心聲，又話沒完沒了嘅批評係無限上綱同文字獄，窒礙咗佢嘅言論自由喎。估唔到有關方面唔使出手，泛民就自我分裂，鬼打鬼互插。