中環出更：《好報》又踢爆 貪曾濫權收禮
東方報業集團去年踢爆「貪曾」前特首曾蔭權爵士涉「侵吞」一批貴價茅台酒，喺各方輿論壓力下，近日要鬼祟將茅台酒「歸還」特首辦。不過，貪曾貪婪成性，貪性無盡頭，尋日隨《太陽報》附送嘅《好報》又獨家踢爆貪曾利用前任行政長官辦公室（前特首辦）做「收禮中轉站」，鬼祟派人從辦公室運走疑喺節日收到嘅禮物。由於現時當局無監管非受薪公職人員收禮，變相容許貪曾「攞正牌」收禮、袋袋平安。
位於堅尼地道嘅前特首辦，本來用作提供前特首進行推廣香港及禮節性工作，但自從貪曾卸任後進駐，前特首辦就變得烏煙瘴氣。貪曾除咗喺離任前將一批總值近一百八十萬元嘅貴價茅台酒運到前特首辦儲存後，早前中秋節臨近，我哋又直擊唔少人絡繹不絕送禮到前特首辦，禮物種類應有盡有，包括水果、名貴茶葉以至海味等，部分禮物則寫有貪曾個名。
名茶海味水果賀中秋
在九月十日，先有人送一盒桃到前特首辦，三日後再有兩名男子送來一份三呎長嘅大禮盒，莫非係名貴大花樽或陶瓷？個多小時後又有人送上朱古力禮品及一籃禮品。直到中秋節前三日，即九月十六日，我哋發現有人到前特首辦送上兩袋名貴茶葉，明顯係中秋禮品，其中一袋寫上「致曾蔭權」，貪曾收禮證據確鑿，難以抵賴。
翌日我哋又見到有送貨員到前特首辦送上一籃禮物，包括鮑魚、冬菇等海味禮包，禮物籃更以絲帶精美包裝，但到底係送畀邊個，送貨員就話「唔講得o架！」似乎有難言之隱。
環保袋掩藏 拒答記者
不過，好戲在後頭，我哋發現分別喺十月初同十月底，原本負責保護貪曾嘅兩名G4（保護要人組）人員，淪為貪曾私人送貨員，每人從前特首辦運走大袋物品，而且為免外人得知，兩名G4人員小心用深色環保袋遮掩，對於一切提問都不作回應，未知係咪幫貪曾帶走禮物。最令人大惑不解係，貪曾嘅政治影響力已經所剩無幾，而佢貪腐醜聞更加傳千里，加上廉政公署仍然調查緊佢嘅貪腐案，點解仲有人敢送禮畀佢呢？
卓妮