中環出更：貪曾好帶挈 老婆遭「掌摑」
「貪曾」前特首曾蔭權爵士任內貪盡海陸空、歎盡省港澳嘅醜事傳千里，搞到卸任後出入住所或外遊都閃閃縮縮，近日卓妮又發現佢同太太曾鮑笑薇秘密遊日本大阪，直至尋日中午先返港，經機場貴賓特別通道入境。期間地勤人員出於好意伸手示意曾太小心出口嘅自動玻璃門，點知曾太心急衝出門口上車，忙亂中地勤人員隻手就意外地「掌摑」到曾太塊臉。開講有話禍不及妻兒，貪曾因為自己鬼祟而連累曾太意外被「掌摑」，認真好帶挈。
貪曾嘅鬼祟事迹總係一不離二，繼早前鬼祟將百多支美酒運送返禮賓府後，上周二（廿二日）又秘密去咗日本大阪「疏乎」五日四夜，似乎睇中日本開始踏入賞紅葉佳期，直至尋日先返港，卓妮就喺機場直擊整個過程。尋日中午十二點半鐘左右，一向負責護送貪曾出入嘅多名G4（保護要人組）人員突然喺機場貴賓室上落客位出現「睇位」，佢哋見到卓妮都有啲愕然，之後就逕自走入貴賓室視察環境。
翻查航班資料顯示，尋日下午由大阪返港嘅班機喺一時十分抵港，理論上貪曾夫婦經貴賓通道出入，下午一時半左右應該可以離開，但就遲遲未見佢哋蹤影。直到下午一時五十分，G4人員再次現身，而早前停泊喺隱蔽位置嘅貪曾座駕亦突駛至貴賓室門口上落客位，貪曾隨即在G4人員品字形護送下上車，其中一名G4人員更好無品咁出手遮擋鏡頭。連貪曾呢啲貪官都要咁落力保護，納稅人嘅錢真係使得冤枉。
地勤人員疑「收掣不及」
至於尾隨貪曾多個身位嘅曾太隨後亦準備步出貴賓室，當時有地勤人員好心伸出右手示意曾太小心出口嘅自動玻璃門，然而曾太心急向前衝，從卓妮喺現場角度所見，該名地勤人員疑「收掣不及」，手掌就「摑」落曾太左邊臉上，地勤人員稍為定神再用左手輕扶曾太，場面相當尷尬。不過，曾太並無怪責地勤，反而強顏歡笑疑似忍痛急步登上座駕。
咪以為貪曾夫婦上車後就走得，G4人員之後仲要急急腳返貴賓室幫佢哋攞行李，其中一件相信係貪曾嘅相機袋，睇怕都係去大阪影紅葉居多，亦反映佢對今次秘密遊日幾上心。如果佢在任期間用番同一心思去處理政務，依家市民就唔使叫苦連天，新政府亦唔使執佢手尾喇！
卓妮