政情：政改綠燈 政黨窒步
上次二○一○年政改，各黨派爭相提出政改方案建議，務求同終極方案搵出相同之處，然後即可高舉「成功爭取」旗幟。不過，事隔三年，政治氣候已經大為不同，即使政府講明年底推政改諮詢文件，但各黨派都依然唔敢輕舉妄動提出政改建議，以免日後中央好似當年咁突然就政改方案讓步，黨派無得「轉身」之餘，仲分分鐘做咗替死鬼都唔知咩事。
建制泛民怕做替死鬼
有建制派中人形容，現時無論係建制派定係泛民主派，邊個提出政改方案建議，就會被對手好似鯊魚咁狂噬，如果太進取會被建制派人士批評違反《基本法》，建議太保守又會被激進泛民主派臭罵「出賣民主」，如果方案係不變應萬變，又會被人話係原地踏步，總之講咩方案都可能會被人攻擊。
呢位建制派中人又話，由於上次中央突然就政改方案急轉彎讓步，事前根本無先兆，所以如今貿貿然提出方案同最終方案好大出入，咁要轉身就真係好難喇，所以近日各黨派都係你眼望我眼，敵不動、我不動，就算敵動我都不敢動。好似真普選聯盟一個月前叫咗泛民各黨派盡快提交普選特首方案，奈何唔少人至今仍然「欠交功課」。
其實從邊個泛民黨派肯提交方案，就預計到未來政改條路點行，好似有啲政黨預咗好大機會喺政改投反對票，所以現階段提咩政改建議都無乜所謂，總之到最後反對就得喇，可以話零成本、零風險。相反對於一啲隨時會因應時勢改變投票取向嘅政黨，例如遲遲唔肯交方案嘅白鴿黨，就深明本身未必一定投反對票，所以一直唔敢開天索價，以免開價太高最終玩火自焚。
據聞坊間有個建制派都接受嘅方案，連白鴿黨內部都覺得可行，但該黨內部評估過，如果現階段接受呢個方案，實會被人臭罵「出賣民主」，到底該黨日後點轉身，大家就拭目以待喇。