香港女童軍總會自二○一○年爆出總監邊陳之娟涉嫌違規超齡參選事件後，告密信風波不絕，事件更發展到有泛民主派立法會議員提出質詢關注事件，嚴重影響女童軍聲譽。有傳當時嘅副會長、前教育局局長孫明揚太太鍾小芬因為連串風波而意興闌珊，因而辭去副會長職務，淡出女童軍總會。不過，隨着明年四月換上名譽副會長何超鳳做總監，有傳孫太將會重返女童軍繼續擔任副會長。
孫太接受查詢時證實，日前女童軍內部已通過任命佢為副會長，待下月中大會確認後就正式返回女童軍大家庭。不過，佢就否認當年離開女童軍嘅傳言，仲趁機會澄清當年不可透露的離開原因，其實係要照顧當時患腎病嘅孫公，因而分身不暇處理繁重會務，絕非其他原因，又強調加入女童軍係佢一生嘅光榮。至於點解決會內出現告密者嘅情況，孫太就好包容話，來年上任後定當盡力保持會內良好美德，希望氣氛更勝佢離開之前喎。
雖然孫太聲稱當年因為要照顧孫公而淡出女童軍，但依家佢又喺總監選舉後回巢，即喺總監彭徐美雲準備交棒畀何超鳳之際回巢，實在令外界產生好多聯想，質疑係咪「一朝天子一朝臣」。抑或係孫公近年身體健康狀況已好咗好多，所以孫太有空餘時間參與女童軍會務呢？