政情：李達三同情賊人「好辛苦」
近期本港獨立屋豪宅爆竊案頻頻發生，慈善家、聲寶－樂聲（香港）創辦人李達三嘅居所亦遭賊人光顧，損失幾萬元金器擺設。日前李達三同太太李葉耀珍出席一個活動，我哋問佢有冇受到驚嚇，李達三笑笑口話冇咩事，仲好豁達話自己冇乜財富，損失不大，仲同情賊人好辛苦添。
遇竊唔計較損失
當晚活動係浙江省同鄉會聯合會（浙聯會）婦女委員會成立儀式，雖然李達三已九十二歲高齡，但都熱心出席支持鄉里，事關佢係浙聯會嘅創會會長。講起當日被賊入屋爆竊，佢話工人朝早起身已發現屋內好凌亂，當時有一位保安休息，先至被賊人有機可乘，事後已加強保安。講講吓，李達三竟然同情賊人，話做小偷都幾辛苦，自己損失些少唔好計較咁多，認真菩薩心腸。
浙聯會婦委會主席由香港中國旅行社總監應炳囡擔任，佢希望藉此凝聚浙江籍婦女力量，改善佢哋喺本港政治、經濟、法律同社會地位。當晚身為浙江鄉里嘅行政會議成員羅范椒芬都喺度，唔知佢哋係咪想向羅太取經呢？