呢幾個月有成三名政治助理相繼辭職，之但係「有人辭官歸故里、有人漏夜趕科場」，好似勞工及福利局前政治助理莫宜端（Zandra），今年八月以照顧仔女為由辭職，點知話咁快就搵到人接替，就係「挺梁」嘅齊心基金會副行政總裁黎穎瑜，下月一日正式上任。
三十六歲嘅黎穎瑜，二○○○年喺中文大學社會學系以一級榮譽畢業，同年獲頒羅德獎學金，到牛津大學修畢社會學碩士。佢做過理工大學及香港大學專業進修學院講師、電台節目主持、智經研究中心政策倡議總監，依家仲係文藝復興基金會副理事長。智經以至齊心基金會，都係特首看重嘅智囊，相信呢個背景為佢加分不少。
另一名因病呈辭嘅新聞統籌專員嘅鄧惠鈞（June）又搵到工作，政府尋日都公布，接受佢擔任義務工作發展局成立嘅香港義工學會管理委員會成員，認為不會構成任何衝突。